பயம்

"பே" என்ற சத்தத்தில்
திடுக்கிட்டு திரும்பினேன்
பயந்தது நான் மட்டுமே
கலகலவென்று அருகில்
சிரித்தது மழலை...

முன்னொரு பொழுதில்
நானும் இருந்திருக்கலாம்
பயம் அறியாமல் சிரித்தபடி...

தனிமையின் துணையில்
அடிவயிற்றில் சுருள்கிறது
ஆளில்லா இடத்தில்
நெஞ்சில் மிதிக்கிறது
அரவமில்லா பொழுதில்
மூச்சை அடைக்கிறது

எப்பொழுது என்னுள்
நுழைந்தது என்று தெரியவில்லை
ஆனால் எப்படியோ
என்னுடன் இருக்கிறது

தனிமையான நாளில்
இருளின் அடர்த்தியில்
நிசப்தம் நுழையும் பொழுது
என்னுள் படர்கிறது

வெளிச்சத்தில் வந்து
கூட்டத்துடன் கலந்தேன்
யாரும் கவனிக்கவில்லை என
என்னுள் மீண்டும் எழுந்தது

இப்பொழுது எல்லோரும்
என்னைப் பார்க்கிறார்கள்
என்று மீண்டும்
என்னுள் துளிர்க்கின்றது

எப்பொழுதும் இல்லாவிடினும்
அவ்வபொழுது வந்து
என்னுடன் எப்பொழுதும்
இருக்கிறது ...

பயமுறுத்தினாலும் சிரிக்கும்
மழலையைக் கண்டு யோசிக்கிறேன்
எப்போழுது என்னுள்
நுழைந்திருக்கும் என்று...