பனியுலகப் பயணம்

பனி பொழியும் இடத்திற்கு
அழைத்துச் செல்ல
ஆசைப்பட்டாள் சின்ன மகள்

மறுக்க மனமின்றி
மென்மையாகச் சிரித்து வைத்தேன்
மெளனம் சம்மதம் என
கற்பனையில் மிதந்தாள்

பனிநீரில் மீன் பிடிக்க
மண்புழு வாங்கி வந்தாள்

எழில்மிகு உருவங்கள்
பனிக்கட்டிகளில் உருவாகின
பனிச்சறுக்கு விளையாட்டில்
இருவரும் களித்திருந்தோம்

தாயாக உருமாறி
போர்வை தந்தாள்
பக்குவமாக சமைத்து
ருசியாகப் பரிமாறினாள்

பனிபிரதேசத்தின் பிரவேசத்தில்
களைத்து கண் மலர்ந்தாள்
பனிபூத்த மலர்போன்று
புன்னகையுடன் அவள்
மற்றொரு கற்பனை தேசத்தில்...

அவள் நிம்மதியின் தாக்கத்தில்
மனதில் அமைதி பூத்தது

பசியின் கொடுமையும்
யுத்தத்தின் கொடூரமும்
பிஞ்சுகளின் நிம்மதியை
பறிக்கும் நினைவு
மனதில் வலியை விதைத்தது

புவி எங்கும் அமைதி பூக்கட்டும்
என்ற பிரார்த்தனைகளோடு
முடிந்ததது பனியுலகப் பயணம்